پاکستان بھر میں عیدالاضحیٰ مذہبی جوش و جذبے کے ساتھ منائی جا رہی ہے جہاں ملک بھر کے عوام سنت ابراہیمی کی پیروی میں اپنے جانور اللہ کی راہ میں قربان کررہے ہیں۔

ملک بھر میں صبح کا آغاز نمازِ عید کے اجتماعات سے ہوا، اسلام آباد اور چاروں صوبائی دارالحکومت کراچی، لاہور، کوئٹہ اور پشاور سمیت ملک کے تمام چھوٹے بڑے شہروں میں نمازِ عید کی ادائیگی کے لیے ہزاروں روح پرور اجتماعات منعقد کیے گئے۔

مساجد، عید گاہوں، امام بارگاہوں اور کھلے میدانوں میں ہونے والی نماز کے دوران علمائے کرام نے اپنے خطبات میں حضرت ابراہیمؑ اور حضرت اسمٰعیلؑ کی عظیم قربانی کے فلسفے کی اہمیت پر روشنی ڈالی۔

بعد ازاں، امت مسلمہ کی بہتری، ملک کی ترقی وخوشحالی اور سلامتی کے لیے خصوصی دعائیں کی گئیں۔ اس موقع پر عید گاہوں اور مساجد میں سیکیورٹی کے سخت انتظامات کیے گئے ہیں۔

صدر اور وزیراعظم کی قوم کو عید کی مبارکباد

صدر مملکت آصف علی زرداری اور وزیراعظم شہباز شریف نے قوم کو عیدالاضحیٰ کی مبارکباد دی۔

صدر زرداری نے اپنے پیغام میں کہا کہ ہمیں اپنے رویوں میں قربانی، محبت، بھائی چارے اور اتحاد کو فروغ دینا ہوگا جب کہ بطور قوم ایک دوسرے کا سہارا بن کر پاکستان کو ایک عظیم اور خوشحال ملک بنانا ہے۔

وزیراعظم شہباز شریف نے کہا کہ پاکستان ترقی کی راہ پرگامزن ہے، قربانی اور اتحاد کے جذبے کی ضرورت ہے، قربانی کا جذبہ ہی پاکستان کی تقدیر بدل سکتا ہے۔

فیلڈ مارشل اور سروسز چیفس کی عید کی مبارکباد

پاک فوج کے شعبہ تعلقات عامہ (آئی ایس پی آر) کی جانب سے جاری بیان میں کہا گیا کہ عید الاضحیٰ کے موقع پر فیلڈ مارشل عاصم منیر، چیئرمین جوائنٹ چیف آف اسٹاف کمیٹی جنرل ساحر شمشاد، فضائیہ اور بحریہ کے سربراہان نے قوم کو مبارک باد پیش کی ہے۔

آئی ایس پی آر کی جانب سے بیان میں کہا گیا ’پاکستان کی مسلح افواج امن، ترقی اور قومی یکجہتی کے لئے دعا گو ہیں جب کہ مسلح افواج قوم کے ساتھ کھڑی ہے اور دفاع وطن کے لئے ہمہ وقت تیار ہے‘۔

بیان میں مزید کہا گیا کہ پاکستانی قوم کی غیرمتزلزل استقامت کو خراجِ تحسین پیش کرتے ہیں، عیدالاضحیٰ قربانی، اتحاد اور غور و فکرکا مقدس موقع ہے، اللہ کرے یہ بابرکت موقع ہمارے معاشرے میں ہم آہنگی کو فروغ دے اور اس ملی یکجہتی کو مضبوط کرے۔

مزید کہا ’آج شہدا کو یاد کرنے اور ان کے خاندانوں کے ساتھ اظہار یکجہتی کا بھی دن ہے‘۔