صدر مملکت آصف علی زرداری نے گوجرانوالہ چھاؤنی کے دورے کے موقع پر پاک فوج کی پیشہ ورانہ مہارت اور جرات کو خراج تحسین کرتے ہوئے کہا کہ پاک فوج نے دشمن کے ناپاک عزائم کو چند گھنٹوں میں ناکام بنایا۔
پاک فوج کے شعبہ تعلقات عامہ (آئی ایس پی آر) کے مطابق صدر مملکت آصف علی زرداری نے گوجرانوالہ چھاؤنی کا دورہ کیا، وفاقی وزیر داخلہ بھی ان کے ہمراہ تھے۔
صدر مملکت کی آمد پر آرمی چیف جنرل سید عاصم منیر نے ان کا استقبال کیا، اس موقع پر منگلا اور گوجرانوالہ کور کے کمانڈرز بھی موجود تھے۔
صدر پاکستان نے بنیان مرصوص کو کامیاب بنانے میں پاکستان کی مسلح افواج کے مثالی طرز عمل اور پیشہ وارانہ مہارت کو سراہتے ہوئے بلا اشتعال جارحیت کے مقابلے میں ان کے پختہ عزم اور غیر متزلزل حوصلے کا اعتراف کیا۔
آصف علی زرداری نے مادر وطن کے دفاع میں اپنی جانوں کا نذرانہ پیش کرنے والے فوجی اور سویلین شہدا کو زبردست خراج عقیدت پیش کرتے ہوئے کہا کہ ان کی قربانیاں ایک مقدس امانت اور پائیدار قومی فخر کا ذریعہ ہیں۔
انہوں نے اس بات پر زور دیا کہ قوم کے پائیدار جذبے سے مضبوط مٹی کے بیٹے مادر وطن کے دفاع کے لیے غیر متزلزل عزم کے ساتھ کھڑے ہوئے اور غیر معمولی بہادری اور آپریشنل ہوشیاری کے ساتھ دشمن کے عزائم کو ناکام بنا دیا۔
صدر پاکستان کا کہنا تھا کہ تاریخ گواہ ہے کہ کس طرح چند گھنٹوں میں پاکستان کی مسلح افواج نے بے مثال درستگی اور عزم کے ساتھ جارحیت کو پسپا کر کے پاکستان کی طاقت، لچک اور قومی اتحاد کا واضح پیغام دیا۔
آصف علی زرداری نے افسران اور فوجیوں کے ساتھ بات چیت کے دوران، ان کے مثالی حوصلے، جنگی تیاری اور فرض کے تئیں لگن کو سراہا۔
انہوں نے آپریشن بنیان مرصوص کے کامیاب اختتام پر دلی مبارکباد پیش کی اور قوم کے محافظوں پر گہرے فخر کا اظہار کرتے ہوئے اس بات کا اعادہ کیا کہ پاکستانی عوام اپنے بہادر سپاہیوں کو قومی عزت اور خودمختاری کے حقیقی محافظوں کے طور پر انتہائی قدر کی نگاہ سے دیکھتے ہیں۔
