پاکستان اور انڈیا کے درمیان جاری کشیدگی کے پیشِ نظر پاکستان کے زیرِ انتظام کشمیر کے دارالحکومت مظفرآباد میں شہری دفاع کے محکمے نے ممکنہ جنگی حالات سے نمٹنے کے لیے مختلف تعلیمی اداروں میں طلبا زندگیاں بچانے کی تربیت دینے کے سلسلے کا آغاز کر دیا ہے۔
اس تربیتی پروگرام میں ابتدائی طبی امداد، پناہ گاہوں کا استعمال اور بمباری یا گولہ باری کے دوران حفاظتی تدابیر سے متعلق بتایا گیا۔
محکمہ شہری دفاع کے اہلکار باسط مغل جو اس تربیتی پروگرام کی سربراہی کر رہے تھے نے بتایا کہ ’ہمارا مقصد بچوں اور اساتذہ کو اس حد تک تربیت دینا ہے کہ وہ کسی بھی ممکنہ جنگی صورتحال میں خود کو اور اپنے ارد گرد موجود دیگر لوگوں کی زندگیوں کو محفوظ بنا سکیں۔‘
اُن کا مزید کہنا تھا کہ ’یہ تربیتی پروگرام ایک ایسے وقت میں شروع کیا گیا ہے کہ جب دونوں ممالک کے درمیان لائن آف کنٹرول پر کشیدگی میں اضافہ دیکھنے میں آرہا ہے۔‘
