چین کے دارالحکومت بیجنگ کے شمالی علاقوں کو ہفتے کو طوفان نما غیر معمولی آندھی نے اپنی لپیٹ میں لے لیا جس کی وجہ سے تاریخی مقامات کو بند کرنا پڑا اور سفر میں خلل پڑا جبکہ کچھ علاقوں میں دیر سے برفباری اور ژالہ باری ہوئی۔
خبر رساں ادارے رائٹرز کی رپورٹ کے مطابق کھڑکیاں ہل گئیں جبکہ درخت فٹ پاتھوں اور کاروں پر گر گئے، پڑوسی ملک منگولیا سے آنے والے ٹھنڈے بھنور کی وجہ سے چلنے والی ہوا کے جھونکوں سے درجہ حرارت میں کمی واقع ہوئی۔
چین کی سرکاری خبر رساں ایجنسی شنوا کے مطابق جمعے سے شروع ہونے والی ہوائیں ہفتے کے اختتام پر بھی جاری رہیں اور 150 کلومیٹر فی گھنٹہ (90 میل فی گھنٹہ) کی رفتار سے ہوائیں چلیں جبکہ اندرون منگولیا میں دیر سے برفباری اور جنوبی چین میں ژالہ باری ہوئی۔
بیجنگ نے رواں ہفتے کے آخر میں ایک دہائی میں پہلی بار دوسری سب سے زیادہ آندھی کا الرٹ جاری کیا ہے جس میں 22 ملین رہائشیوں کو خبردار کیا گیا ہے کہ وہ غیر ضروری سفر سے گریز کریں کیونکہ ہوائیں ممکنہ طور پر اپریل 1951 کے ریکارڈ توڑ سکتی ہیں۔
ابتدائی انتباہ کے بعد کچھ رہائشیوں نے کہا کہ وہ بہت پریشان تھے لیکن پھر بھی وہاں پہنچنے میں کامیاب رہے۔
سرکاری میڈیا کے مطابق دوپہر دو بجے تک بیجنگ میں ہواؤں نے 703 درختوں کو اکھاڑ دیاتھا جبکہ بیجنگ کے دو بین الاقوامی ہوائی اڈوں، بیجنگ دارالحکومت اور بیجنگ ڈاکسنگ پر 693 پروازیں منسوخ کردی گئی تھیں۔
سوشل میڈیا چیٹس پر ہواؤں کا غلبہ رہا اور بہت سے لوگوں نے حالات کا سامنا کرنے والے فوڈ ڈیلیوری ورکرز کے بارے میں تشویش کا اظہار کیا۔
ایک ویبو صارف نے لکھا کہ ’اس طرح کے موسم میں، ہم ڈلیوری کا آرڈر نہ دینے کا انتخاب کرسکتے ہیں ، یہ ان کے لئے بہت مشکل ہے۔
ہواؤں کی وجہ سے اتوار کے روز ہونے والے ہاف میراتھن سیٹ کو ملتوی کرنے پر مجبور ہونا پڑا جس میں انسان نما روبوٹس انسانوں کے ساتھ مقابلہ کر رہے تھے تاکہ چین کی تکنیکی ترقی کو ظاہر کیا جا سکے۔
شنوا اور سرکاری نشریاتی ادارے سی سی ٹی وی کے مطابق اندرونی منگولیا سے دریائے یانگزی تک ریت کے طوفان نے 8 صوبوں میں سڑکوں پر آمدورفت کو مفلوج کر دیا ہے۔
ہفتے کی سہ پہر سے اتوار کی صبح تک ریت کے طوفان کی جانب سے شنگھائی کو متاثر کرنے کی توقع ہے، موسم بہار میں منگولیا سے ریت اور گرد و غبار لانے والی تیز ہوائیں معمول کی بات ہیں، لیکن آب و ہوا کی تبدیلی نے موسمی واقعات کو مزید شدید بنا دیا ہے۔
