آرگینک خوراک اور مصنوعات پر ریسر چ کرنے والے ادارے کے سربراہ نجم مزاری نے کہا ہے کہ امریکہ سمیت جن ممالک میں آرگینک خوراک اور مصنوعات کا رجحان فروغ پارہا ہے خوش قسمتی سے پاکستان کے ان ممالک سے بہترین تجارتی تعلقات ہیں ، ہمارے پاس آرگینک خوراک اور مصنوعات کی اربوں ڈالر کی عالمی مارکیٹ میں ” میڈ ان پاکستان ”کی شناخت کا سنہری موقع ہے ۔
اپنے بیان میں نجم مزاری نے کہا کہ وزیر اعظم شہباز شریف ، وزیر منصوبہ بندی احسن اقبال اور وزیر غذائی تحفظ و تحقیق رانا تنویر حسین سے اپیل ہے کہ ہماری گزارشات کو سنا جائے ،یہ وہ شعبہ ہے جس کے ذریعے نہ صرف پاکستان میں روزگار کے بڑے پیمانے پر مواقع پیدا ہوں گے بلکہ پاکستان عالمی مارکیٹ میں آرگینک خوراک اور مصنوعات کے بڑے برآمد کنندہ کے طور پر خود کو منوا سکتا ہے ۔
حکومت پہلے قدم کے طو رپر آرگینک خوراک کی کاشتکاری کیلئے مہم چلائے اور خواہشمند کسانوں کو راغب کرنے کیلئے سبسڈی د ی جائے ،
معیار کو یقینی بنانے کے لئے حکومت کی سطح پر لیبارٹریز، لیبلنگ اور سرٹیفکیشن کا نظام دیا جائے اور پھر پوری تیاری کے ساتھ دنیا میں خود کو پیش کیا جائے ۔ نجم مزاری نے کہا کہ تجزیاتی رپورٹس کے مطابق پاکستان آرگینک خوراک اور مصنوعات کی اربوں ڈالر کی مارکیٹوں میں بڑا حصہ دار بن سکتا ہے لیکن اس کے لئے ہمیں بلا تاخیر عملی پیشرفت کرنا ہو گی ، ہم اس کے لئے بھرپور تعاون کرنے کے لئے تیار ہیں کیونکہ ہمارا مقصد دنیا میں پاکستان کا نام روشن کرنا اور ملک کے لئے قیمتی زر مبادلہ حاصل کرنا ہے ۔
