پنجاب حکومت ہر گلی، محلے کو شہر خموشاں بنانا چاہتی ہے، سی پی این ای

کونسل آف پاکستان نیوز پیپر ایڈیٹرز (سی پی این ای) نے پنجاب عوامی آگاہی اور معلومات کی ترسیل بل 2025 کو سنسر شپ کی بدترین آمرانہ شکل قرار دے دیا ۔

سی پی این ای کے صدر کاظم خان نے کہا ہے کہ جس صوبے میں سوال کرنے پر پابندی لگ جائے وہ ظلم اور جبر کی زندہ مثال ہوتا ہے ۔

پنجاب حکومت کو چاہیئے کہ ہر اس شخص کے بولنے پر پابندی لگا دے جو زندہ ہے ۔ آپ سوال کرنے کے حق کو کیسے چھین سکتے ہیں ۔

پنجاب حکومت ہر گلی ، محلے کو شہر خموشاں بنانے پر تلی ہوئی ہے ۔ لوکوں کو طاقت کے ذریعے مجبور کیا جا رہا ہے کہ نا جائز کو جائز کہیں ۔ آگاہی کو دکھلاوے کی عملی شکل بنانے پر حکومت کو مبارکباد پیش کرتا ہوں۔

جب تک حکومت احتجاج کا حق بھی نہیں چھین لیتی، ہم بولیں گے ۔ انہوں نے مزید کہا کہ یہ بل سرکاری خزانے سے ذاتی تشہیر پہ خرچ گئے اخراجات کو قانونی تحفظ فراہم کرتا ہے ۔

بل کے یکم جنوری 2024سے اطلاق کا مطلب عام انتخابات سے قبل چلائی گئی تشہیری مہمات کو جائز قرار دینا ہے ۔ اس بل کے ذریعے سیاسی فائدے کے لئے عوامی پیسے کے استعمال کو قانونی قرار دینا ہے ۔ جس سے غیر منتخب سیاسی شخصیات کی عوامی پیسے پر تشہیر ممکن ہو سکے گی ۔

یہ بل سپریم کورٹ کے فیصلوں سے براہ راست متصادم ہے اور عدالت میں زیر سماعت مقدمات پر اثر انداز ہونے کی کوشش ہے ۔

سرکاری مہم پر اعتراض بھی سرکاری ملازم ہی سنے گا ۔ بل کے ذریعے غیر جانبدار احتساب کا تصور دفن ہو جائیگا ۔انہوں نے حکومت پنجاب اس بل کو فی الفور واپس لینے کا مطالبہ کیا۔

جاری کردہ: کونسل آف پاکستان نیوز پیپر ایڈیٹرز