’ایک کروڑ دو ورنہ قتل کردیں گے‘، فاسٹ باؤلر کو دھمکی

بھارتی کرکٹ ٹیم کے مسلمان فاسٹ باؤلر محمد شامی کو ایک دھمکی آمیز ای میل موصول ہوئی ہے جس میں ان سے ایک کروڑ روپے کا مطالبہ کیا گیا ہے اور نہ دینے پر جان سے مارنے کی دھمکی دی گئی ہے۔

بھارتی میڈیا رپورٹس کے مطابق محمد شامی کو جان سے مارنے کی دھمکی ملنے کے بعد ان کے بھائی حسیب احمد نے ریاست اتر پردیش کے ضلع امروہہ میں سائبر کرائم پولیس اسٹیشن میں ایف آئی آر درج کروادی۔

سپرنٹنڈنٹ آف پولیس (ایس پی) کے احکامات پر درج کی گئی ایف آئی آر کے مطابق راجپوت سندر نامی شخص کی جانب سے بھارتی فاسٹ باؤلر کو ایک ای میل موصول ہوئی جس میں ایک کروڑ روپے تاوان کا مطالبہ کیا گیا۔

یاد رہے کہ محمد شامی اس وقت انڈین پریمیئر لیگ (آئی پی ایل) 2025 میں سن رائزرز حیدرآباد کی نمائندگی کررہے ہیں۔