پاکستان نے بھارتی پروپیگنڈے کے جواب میں عالمی سطح پر مہم شروع کرنے کا فیصلہ کیا ہے اور اس کے لیے وزیراعظم شہباز شریف نے حالیہ پاک-بھارت کشیدگی کے بعد چیئرمین پیپلزپارٹی بلاول بھٹو زرداری کو عالمی سطح پر پاکستان کا ’امن کا مؤقف‘ پیش کرنے کا ٹاسک دے دیا۔
بلاول بھٹو زرداری نے سماجی رابطے کی ویب سائٹ ’ایکس‘ پر اپنے پیغام میں لکھا کہ آج وزیرِاعظم شہباز شریف کی جانب سے مجھ رابطہ کیا گیا اور انہوں نے درخواست کی کہ میں ایک وفد کی قیادت کرتے ہوئے عالمی سطح پر پاکستان کی نمائندگی کروں۔
ان کا کہنا تھا کہ وزیراعظم نے مجھ سے درخواست کی کہ میں دنیا میں پاکستان کا امن کا مؤقف پیش کروں، مجھے عالمی سطح پر پاکستان کی نمائندگی کی ذمہ داری قبول کرنے پر فخر ہے۔
سابق وزیر خارجہ نے مزید لکھا کہ ’میں ان مشکل حالات میں پاکستان کی خدمت کے لیے پرعزم ہوں‘۔
دوسری جانب، پاکستان پیپلزپارٹی کے ایکس اکاؤنٹ سے کی گئی پوسٹ میں کہا گیا کہ ’وزیر اعظم نے بلاول بھٹو زرداری کی سربراہی میں ایک اعلی سطح کی کمیٹی تشکیل دے دی۔
پوسٹ میں مزید کہا گیا کہ کمیٹی عالمی برادری کو بھارتی جارحیت اور ان کے جھوٹے پروپیگنڈے کے متعلق آگاہ کرے گی۔
پاکستان اور بھارت کی حالیہ کشیدگی کے دوران، چین، ترکیہ اور آذربائیجان نے پاکستان کے لیے بھرپور سفارتی حمایت کا اظہار کیا تھا۔
تاہم، اس کشیدگی میں بھارت کا ساتھ دینے والا واحد ملک اسرائیل تھا، سفارتی تنہائی کا شکار بھارت نے ان ممالک سے بدلہ لینا شروع کر دیا، جنہوں نے حالیہ کشیدگی میں اسلام آباد کی کھل کر حمایت کی تھی۔
اس سے قبل، مودی سرکار کی جانب سے جنگی محاذ کے ساتھ ساتھ خارجہ اور سفارتی سطح پر ناکامی کے بعد ارکان پارلیمنٹ کا وفد مختلف ممالک میں بھیجنے کا فیصلہ کیا تھا۔
